Hargeysa(Bnn)Golaha Guurtida JSL , ayaa fadhigoodii maanta ka soo saaray hadal qoraal ah oo isugu jira Baaq , Taageero , Cambaarayn iyo Gurmad Taakulayn ah.

Guurtida oo hadalkooda kaga waramay halka uu dalku marayo iyo sida wakhtigan loogu baahan yahay isku duubni iyo in laga feejignaado Cadowga , ayaa waxa uu u qornaa sidan:

"Iyadda oo maanta dalkeenu sumcad ahaan meel wanaagsan marayo dhinaca Siyaasadda Gudaha iyo tan Dibeddaba ay wax badani inoo qabsoomeen, inagoo xooga saarnay adkaynta Nabad-gelyadda, caalamkuna inagu amaanay iyo ictiraafkeenii oo soo dhawaaday.

Sidaas darteed, ayaa dad ka xun waxa Somaliland u qabsoomay sidii caadada u ahaydba ay soo Abaabuleen falkan xun ee af-duubka ah, kaas oo Golahani Guurtidduna baaqan ka soo saareen: -

Golaha Guurtidda Qaranka JSL, waxa u baaq taageero ah u diraya Maamulka Gobolka Sanaag, Ciidanka Qaranka ee Jiidaha Hore, Ciidanka Booliska iyo dhammaan dadweynaha ku dhaqan Gobolka Sanaag sidii geesinimada iyo waddanimada ahayd ee ay uga hawl-galeen soo qabashaddii af-duubayaashii falka xun ee argagixisadda ah ka fuliyay Gobolka Sanaag, kuwaasi oo afduubay Maamulihii Hay’adda GAA Mr. Daniel Brenkal.
Golaha Guurtidda Qaranka JSL,

 waxa uu Cambaarayn u jeedinayaa budhcadaas afduubka fulisay iyo cidda ka dambaysa ee soo abaabushay, waxanay xasuusinayaan in dadka reer Somaliland guud ahaan iyo gaar ahaanba Gobolka Sanaagba ay aad uga feejigan yihiin ciddii la timaada falalkaas xun-xun, gacan bir ahna ay ku qabanayaan iyaddoo hore Gobolkaas loogu afduubay hay’addo, qaarkoodna ay ahaayeen Jarmal, balse shacabka Gobolka iyo Maamulka Dowladda ee Gobolka, oo kaashanayay Ciidamaddu ay si geesinimo leh ugu guulaysteen wax-ka-qabashadda arrimahaas foosha xumaa, waxana looga digaya cid kasta oo ku kacda Arrimahaas in gacan bir ah lagu qaban doono, sharcigana la hor gayn doono.

Gebo-gabaddii, Golaha Guurtiddu, waxay dadweynaha Reer Somaliland u soo jeedinayaan in gacan buuxda la siiyo oo lala shaqeeyo Ciidanka Nabad-gelyadda sidaa maantaba loola shaqeeyay, horena ay ula shaqeeyeen reer Dhoqoshay, waxanay Hambalyo iyo Boogaadinba u dirayaan cid kasta oo gacan ka gaysatay Badbaadinta Ninkaas Jarmalka ahaa iyo soo qabashadii Afduubayaashaa Argagixisadda ahaa.

Sidoo kale, waxa Golaha Guurtidu uu baaq Gurmasho iyo Taakulayn ah u soo dirayaa dadka Gobolka Awdal ee dhawaan waxyeeladdu ka soo gaadhay Roobabkii barafka watay ee ku dhuftay Degmooyin ka tirsan Gobolka Awdal, kuwaasi oo waxyeelo ka soo gaadhay, xoolihii oo ka baxay iyo xanuuno ka dilaacay oo dad iyo xoolaba saameeyey.

Golaha Guurtiddu, waxa uu hambalyo u soo jeedinayaa dadka ku dhaqan Gobolka Awdal ee Gurmadka arrintaasi ka sameeyay haddii ay tahay Maamulka Gobolka Awdal, Ganacsatadda, Culimaa’udiin, Hogaan-dhaqameedyo iyo wax-garadba.

Waxa kale oo uu halkan ku amaanaya Xukuumadda, Weftigii Wasiiradda aha iyo cid-kasta oo gacan ka gaysatay gurmadka Masiibaddaas, iyo sida ay hawshaas u wadaan, waxanay ugu baaqayaan dhammaan hay’addaha caalamiga ah, kuwa waddaniga ah iyo ganacsataddaba in gacan laga gaysto, kaalmadda loo fidinaayo dadkaas ay wax-yeeladdu soo gaadhay, haddii ay tahay dhinaca Caafimaadka iyo haddii ay tahay dhaqaalahaba, dadkaas oo ahaa xoolo dhaqato , kaabihii dhaqalaahooda oo ahaa Xoolaha noolina uu ka baxay, loona baahan yahay in wax lagala qabto dib-u-dhiska noloshooda si ay ula qabsadaan soo-saarista nolol maalmeedkooda’’.

Alla Mahad Leh
Shir-guddoonka Golaha Guurtidda JSL.