Abu Dubai (Bnn)Madaxweynaha Somaliland Dahir Rayaale Kaahin iyo weftiga la socda oo shalay socdaal aan rasmi ahayn ku yimid Abu Dhabi, Caasimadda Isutaga Imaaraadka Carabta, ayaa maanta qado sharaf la wadaagay Sheikh Xamadaan bin Zaayid Al Nahyaan oo ah ku-xigeenka Raysul Wasaaraha isla markaana ah Guddoomiyaha Bisha Cas ee Imaaraadka Carabta.

Sida aan ka helay ilo-xogogaal ah waxa la filayaa in uu Madaxweynuhu maalinta Salaasada 20 Feb. 2008 la kulmo madaxda Ururka Bisha Cas oo la filayo in ay Somaliland ka caawiyaan mashaariic dhawr ah oo ka mid yihiin dibu-dhiska waddooyinka dalka.

Socdaalka Madaxweynaha ayaa la filayaa in uu furay xidhiidhkii go’anaa ee Carabta iyo Somaliland.

Inta badan Carabta oo ay hor kacayaan Masar iyo Sucuudiga ayaa ka hor jeeday in la soo dhaweeyo Somaliland, laakiinse socdaalkan oo ka dambeeyey safarkii Madaxweyne Rayaale ku tegay Maraykan iyo booqashadii ay Jendayi Frazer ku timid Hargaysa ayaa tilmaamaya in Maraykanku lug ku leeyahay.

Madaxweynuhu waxa la filayaa in uu dadka Reer Somaliland la kulmo maalmaha soo socda, waxana laga yaabaa in uu Imaaraadka u dhaafo dalal Carbeed oo kale.

Awdalnews