Hargeysa(Bnn)- Guddiga loo xilsaaray qabanqaabada shirweynaha labaad ee xisbiga mucaaradka ah ee KULMIYE oo muddo soo jiitamayey, ayaa markii ugu horreysay maanta ugu dhawaaqay waqtiga uu si rasmi ah u furmayo shirweynuhu oo ku began 29ka February 2008.
Ku dhawaaqistii shalay muddaynta shirweynaha labaad ee KULMIYE, ayaa u muuqday mid ay ku xeernaayeen dareenno xasaasi ah oo iftiiminayey inuu jiro khilaaf xooggan oo xisbiga gudihiisa ah, kaas oo la sheegay inuu salka ku hayo tabashooyin la xidhiidha dhinaca musharaxiinta u tartamaya

jagooyinka Madaxweynaha iyo ku-xigeenka ee xisbiga dhexdiisa oo siyaasiyiin kala duwan damac kaga jiro inay isu soo taagaan, isla markaana aan wax xal ah laga gaadhin xallinta khilaafaadka iyo tabashooyinka KULMIYE gudihiisa, iyada oo ay jireen dhinacyo si weyn uga soo horjeedo in lagu dhawaaqo muddaynta shirweynaha maadaama khilaafyo jiraan.

Warsaxaafadeed oo kooban uu gelinkii dambe ee maanta soo saaray guddoomiyaha guddiga qabanqaabada shirweynaha Dr. Axmed Xaashi Oday oo lagu caddeeyey waqtiga si rasmi ah loogu muddeeyey furitaanka shirweynaha labaad ee KULMIYE iyo muddada uu socon doono, waxa uu u dhignaa sidan:
“Aniga oo ku hadlaya magaca guddida qabanqaabada shirweynaha 2aad ee Xisbiga KULMIYE, waxaan maanta oo taariikhdu tahay 19/02/2008 si cad idiinku war-gelinayaa in la qabanayo shirweynaha 2aad ee xisbiga KULMIYE haddii Alle yidhaa 29/03/2008, laguna qaban doono magaalo-madaxda Hargeysa.

Waxa laga codsanayaa dhammaan xubnaha iyo taageerayaasha xisbiga meel kasta oo ay joogaan (gudo iyo dibedba) in ay si buuxda uga qaybqaataan dhammaystirka diyaargarawga qabashada shirweynaha.
Waxa si gaar ah loogu adkaynayaa ergada ka qaybgalaysa shirweynaha 2aad ee xisbiga inay meel kasta oo ay joogaan si buuxda ugu diyaargaroobaan muddada loo qabtay ee ay haystaan.”

SOurce TOgdheernews