Hargaysa (Bnn)-Waxa maanta ka dhacay magaalada Hargaysa ee caasimada Somaliland kulan balaadhan oo ay isugu yimaadeen saxaafda Somaliland iyo gudida kamooshinka doorashooyinka Somaliland oo ay horkacayaan Gudoomiyaha Komishinka iyo ku xigeenkiisa, kulankani oo lagaga wada hadlaayay sidii ay saxaafdu uga qayb qaadanlahayd arimaha doorashooyinka soo socda ayaa kualnkaasi waxa dibada laga dhigay oo ay gudida doorashooyinku mamnuuceen in ayna shabakadaha wararka ee Somaliland haba yaraatee ka qayb qaadanin baahinta wararka iyo arimaha doorashooyinka Somaliland, isla markaasina waxa shirkaasi maanta ay saxaafada iyo madaxda kamooshinku yeesheen dibada laga dhigay oo goobtaasi uu shirku ka socday kaga mamnuucay shabakadaha Somaliland dadkii ka socday gaar ahaan kuwii goobtaasi tagay.

Gudoomiyaha iyo ku xigeenkiisu toona may faah faahin sababta ay dibada u dhigeen wada shaqaynta shabakadaha wararka ee Somaliland, mar wax laga waydiiyayna way ka gaabsadeen in ay sharxaad ka bixiyaan sababtaasi, hase ahaatee waxa ay sheegeen in ay la shaqaynayaan, Wargaysyada, Idaacada, TV-yada oo qudhaata.

Xiligan ayaa waxa jira shabakado dhowr ah oo laga leeyahay Somaliland oo wararka ka soo dira gobolada kala gadisan ee Somaliland kuwaasi oo ay dadka gobolada durugsan daganina wararka dalka ay kala socdaan ama ka daalacdaan shabakadaha wararka ee Somaliland, goobahaasi oo ayna gaadheen Internetka, hase ahaatee ayna gaadhin

Wargaysyada,Talafeeshinada iyo Idaacadi toona, sidoo kale qurba jooga reer Somaliland ee ku kala filiqsan daafaha dunida ayaa waxa ay wararka kala socdaan shabakadaha wararka ee Somaliland oo si hagar laan ah hadh iyo habaynba isugu xidha gudaha iyo dibada, taasi oo qurba jooga reer Somaliland ay aad uga qayb qaataan dib u dhiska dalka, taasi oo ayna wargaysyada iyo warbaahinta kale ee gaarka looleeyahay iyo kuwa aan loo lahayniba ayna gaadhin dalka gudihiisa, kuwaasi oo ay hada gudiga doorashadu soo xusheen oo qudhaata.

Hadaba kulankaasi maanta ay saxaafada ay Kamooshinka doorashooyinku la qaateen ayaa Komishinka Doorashooyinka oo ay weheliyaan wakiilada xisbiyada, iyo Xildhibaano ka kala tirsan golaha guurtida ayaa maanta u kala baxay gobolada Somaliland, waxana weftiyadaasi ay caawa kala gaadheen magaalooyinka Burco iyo Boorame.

Socdaalka xubnaha komishinka doorashooyinka ayaa la xidhiidha sidii ay gudiyadii doorashooyinka ee gobolada dalka u soo bauuri lahaayeen, isla markaana ay bulshada ku dhaqan gobolada ay ugu wacyi gelin lahaayeen, ka qeyb galka diwaan gelinta codbixiyeyaasha.

Wefti uu hoggaaminayo Gudoomiye ku xigeenka Komishinka Md Xirsi Cali Xaaji Xasan, oo ka kooban 11 xubnood ayaa caawa gaadhay magaalada Burco, ee gobolka Togdheer.

“Waxa socdaalkayagu qaadan doonaa muddo tobaneeyo cisho ah, waxana aanu dadweynaha gobolada Tog-dheer, Sool iyo Sanaag, aanu ku wacyi gelin doonaa sidii aanu loo geli lahaa hawshii diwaan gelinta”Ayuu yidhi Md Xirsi Cali, oo caawa khadka telefoonka iigu waramayay isagoo ku sugan magaalada Burco.

“Weftigan waxa xubno ka ah 3 Xubnood oo komishinka ah, 3 qof oo ka kala socda sadexda xisbi qaran, 3 xubnood oo guurtida ah, sarkaal ka tirsan wasaarada daakhiliga iyo xoghaynta komishinka, waxana aanu soo samaynaynaa wacyi gelin iyo gudiyadii xafiisyada gobolada Bariga Somaliland”Ayuu intaas raaciyay Gudoomiye ku xigeenka Komishinku.

Md Xirsi Cali, oo aan weydiiyay sababta ay weftiga Komishinka ee u kala baxay Gobolada ay uga hadheen xildhibaano ka tirsan Golaha Wakiilada, oo qorshuhu ahaa inay raacaan wufuudaasi, waxana uu yidhi “Golaha Wakiilada waxay ahayd in sida golaha guurtida ay noo soo diraan 6 Mudane oo kala raaca labada Wefti, balse waxay sheegeen in kalfadhigoodii uu socdo oo aanay ka maarmayn Mudaneyaasha, waanay ka cudur daarteen, wayse ku jireen markii hore”.

Dhinaca kale, wefti 11 xubnood ka kooban oo uu Hoggaaminayo Gudoomiyaha Gudida Doorashooyinka Qaranka, Mudane Maxamed Aw-Yuusuf Axmed, ayaa iyaguna caawa gaadhay magaalada Boorame, ee xarunta Gobolka Awdal. Waxana ay halkaasi u tageen sidii ay wacyi gelin ugu soo samayn lahaayeen dadweynaha gobolkaasi.

Gudoomiyaha Komishinka Doorashooyinka, Md Maxamed Aw- Yuusuf Axmed, oo markii weftiga uu hoggaaminayaa ay 8:30 caawa gaadheen Boorame, saxaafada u waramayay, ayaa yidhi “Waxa socdaalkayagu la xidhiidhaa sidii aanu gobolka Awdal, uga furi lahayn xafiisyadii diwaan gelinta codbixiyeyaasha iyo kuwii doorashooyinkaba, waxana aanu kulamo macluumaad ururin ah aanu la yeelanaynaa waxgaradka bulshada”.