Boorama(Bnn)Gudoomiyaha komishanka doorashooyinka qaranka md Maxamed Axmed Yuusuf iyo wafti uu hogaaminayo ayaa shalay kulan balaadhan kula yeeshay xarunta maamulka G/awdal qaybaha bulshada reer Boorama.Kulankaas warbixinta iyo u diyaargarowga diiwaangalinta codbixiyayaasha oo ay u socdaan furitaanka xafiisyadii gobolada ee laga hagi lahaa iyo xafiiskii gobolka ee komishanka doorashooyinka.

Gudoomiyaha oo ay weheliyeen Jaamac Baakistaani oo ka tirsan komishanka qaranka, saedex xubnood oo ka socday xisbiyada, afar xubnood oo guurtida ah iyo xubin ka socotay wasaarada arimaha gudaha, waxaanay salaadiinta iyo dhinacyada kale ee bulshada Boorama ay uga warameen mihiimada ay leedahay hawshan diiwaangalinta iyo sida loogu baahan yahay in cidkastaa qaybteeda ka qaadato.

Badhasaabka G/awdal Maxamuud Sheekh oo kulankaa furay ayaa ka hadlay siyaasada arimaha dibada ee soomaaliland oo meel wanaagsan maraysa iyo sida ay bulshadu isha ugu hayso sida ay u dhacaan doorashooyinka dalka ka dhici doona oo ah tijaabo uu caalamku inagu qiimaynayo iyo sida ay u yihiin furihii aqoonsigeena inoo hayay sidaa awgeed Bulshada reer Awdal iyo reer somalilanda waxa kula dardaarmay in la ilaaliyo nabadgalyada si loo helo jawi ay inoogu dhacaan doorashooyin wanaagsan oo xalaal ahi.

Gudoomiyaha komishanka qaranka Md Maxaed Axmed ayaa isna sheegay in ujeedada socdaalkoodu la xidhiidho furitaanka xafiisyadii heer gobol ee gudiyada diiwaan galinta iyo komishanka doorashooyinka arintaas oo ay xisbiyo iyo xukuumadba ka go,an tahay in la xaqiijyo sida doorashooyinkeenu u noqdaan kuwa xor iyo xalaal ah oo lagu kalsoonaan karo, lana sugo muwaadiniinta xaqa u leh ka qaybgalka codbixinta doorashooyinka.

Waxa kale oo uu sheegay in diiwaangalintu ay gobolkasta ka socon doonto shan maalmood, iyada oo marka horena la sii diyaarin doono imkaaniyaadkii iyo wacyigalinta loo baahan yahay in bulshada la gaadhsiiyo si dadka oo dhami uga qayb galaan, iyada oo xiliga diiwaangalintani ay shaqadu ka socon doonto goobihii hore ee codbixinta doorashooyinkii hore ee gobol walba goobkastana ay ka hawlgali doonaan 8 hawlwadeen si hawsha loo fududeeyo, hawlwadeenka goobtiisa laga soo sheego arimo qaldan ama wax diiwaangalinta ama doorashada wax u dhimaya lala xisaabtami doono.
Ugu dambayntii waxa uu bulshada ka codsaday inay kala shaqeeyaan hawshan baaxada leh"bulshada waxaan ka doonaynaa inay nala shaqeeyaan oo ay hawshan baaxada leh nala fududeeyaan, waayo waxba lama kala riixanayo mana jirto kanaa sidan ah iyo kanaa sidan ah wax qabiil ahina ma jiro qofkastaana waa inta uu isa saaro masuuliyada arintan kaga soo hagaagta"

Salaadiin reer Awdal ah oo ay ka mid ahaayeen Suldaan Ibraahin Jaamac Samatar, Suldaan Ibraahin Dacar, Suldaan C/raxmaan Jaamac Dhawal iyo Suldaan Saleebaan oo halkaa ka hadlay ayaa soo dhaweeyay xubnahan iyo wada shaqeynta ay ku baaqeen, iyaga oo dhinaca kalena muujiyay saluug la xidhiidha qaabka deg deg ah ee loo wado hawshan diiwaangalinta oo ah mid aan suurto gal ahayn in shan maalmood hawl intaa leeg lagu qabto, waxa kale oo ay codsadeen inaanu gobolkoodu noqon ka u horeeya ee hawshan laga bilaabayo iyaga oo u arka in wax la iskaga soo riixayo, waxa kale oo ay ka hadleen sida aanay isku qabanayn bulshadan reer guuraaga ah ee marba meel u hayaamaysa iyo soo jeedinta komishanka ee odhanaysa qofkastaa goobta laga diiwaangaliyay ayuu ka codaynaa, ugu dambayna waxa ay codsadeen in la kordhiyo goobaha codbixinta.

Jaamac Baagistaani oo ah xubin komishanka qaranka ah, iyo xubno kale oo ku hadlayay xisbiyada iyo guurtida ayaa ka dhawaajiyay iyana sida hawshan diiwaangalintu u tahay mid qaran oo xisbiyo iyo xukuumadba laga midaysan yahay, wax weyna ay filayaan inay dalka u soo kordhin doonto.