Aroornimadii saaka ayaa lagu soo waramayaa in meydka nin dhalinyaro ah lagu arkay inta u dhexeysa Hotelka Salaama iyo isgoyska baar Ubax ee wadada Soddonka oo ka tirsan degmada H/wadaag ee magaalada Muqdisho sida dad halkaasi ku sugan ay soo sheegayaan.

Meydka nin dhalinyarada ah oo ay muuqdaan qeybo ka mid ah jirkiisa dhaawacyo rasaaseed iyo dhiig aad u badan ayaa u muuqda nin xalay la qaarajiyey, waxaana goobta uu yiilay soo buux dhaafiyey dad fara badan oo isku dayeyey iney aqoonsadaan meydka ninkaasi dhalinyarada ah oo da’diisa lagu qiyaasay 25 illaa 30 jir sida dadku ay sheegeen

Lama oga illaa hadda cida meydka wiilkaasi dhalinyarada ah soo dhigtay halkaasi ee ka dambeysa dilka loo geystay iyo sababaha loo dilay midna, hase ahaatee waxaa muddooyinkanba mararka qaarkood lagu arkayey qeybo ka mid ah magaalada Muqdisho meydadka dad kala duwan oo la dilay kuwaasoo la soo dhigayo meelo isgoysyo ah iyo wadooyin intaba.

Boramanewsnetwork
Abdoulkarim Qamaan Ali "Fiiri"