Badhan(Bnn) Ciidanka Qaranka Somaliland ayaa si buuxda ula wareegay gacan ku haynta Magaalada Badhan oo ah Magaalada ugu weyn Bariga sanaag.

Ciidanka Oo ku gaashaman Gawaadhida dagaalka ayaa shalay si buuxda ula wareegay Badhan iyadoo aan wax dagaal ahi ka dhicin, ciidankii Puntlanda ay iskaga baxayn.

Ciidanka la wareegay Dhahar waxa hogaaminayey Talyiha Saldhiga seddexaad ee ciidanka Qaranka JSL Md. Muuse Jaamac Delaf iyo Wasiirka Kaluumaysiga JSL Md. Cali Maxamed Qoorseef.

Ka hor intaanay Ciidanka Somaliland la wareegin Dhahar waxa jidka u galay Maleeshiyo Beleed uu hogaaminayo nin la yidhaahdo C/laahi Cumar Cashuur oo kasoo jeeda Deegaanka dhahar isagoo watay Maleeshiyo beleedyo ay isku heeb yihiin.

Markii Ciidanka iyo Waftiga wasiirku ogaadayn in Jidka loogu jiro waxay ka leexdayn wadadii ay haystayn iyagoo qaaday wado kale oo tagta Badhan.

Ciidanka Qaranka ayaa hareereyey Maleeshiyo Beleedka, Balse odayaasha Deegaanka ayaa ka codsaday ciidanka Somaliland inaanay dagaal ku qaadin maleeshiyada, iyagoo odoyaashu ku guulaystay inay kala furfuran maleeshiyada. Sidaana ciidanka Somaliland iyo waftigii wasiirku ay ku galayn badhan iyagoo nabad qaba.

Sida wararka nagu soo gaadhayan ninka la yidhaahdo Cashuur ee watay Maleeshiyada waxa kulan la yeshay wasiirka Kaluumaysiga Md qoorseef magaalada Badhan dhexdeeda.

Ciidanka qaranka Somaliland ayaa la sheegay inay hada qarka u saran yihin magaalada Dhahar oo ay sanadkii hore ku dagaaalamayn ciidamada Somaliland iyo Puntland.

Wararka saaka kasoo baxaya Magaalada Badhan ayaa cadeenaya in xalay uu magaalada u hoyday Gudoomiyaha Barlamaanka Puntland oo layidhaahdo Axmed Cali Xaashi, iyadoo la sheegay in odayaasha deegaanku ay ku qanciyeen Gudoomiyaha inuu ka baxo Badhan madaama ay dadka deegaanku ay taageersan yihin Somaliland.

Wararka ka imanaya dhinaca Puntland ayaa xaqiijinaya in Ciidan Puntland ahi ay kasoo ambo baxayn magaalada Bosaaso iyagoo kusoo jeeda Deegaanka Dhahar.

Si kastaba ha ahaate waxay u muuqata in Somaliland iyo Puntland ay markale isku faro saarayaan deegaana bariga Sanaag iyadoo dowlada Somaliland sheegtay inay ka go’an tahay inay gaadho xuduudkeeda.

Borama News Network
Hargeysa Office