Mogadishu(Bnn)Ciidamo aad u fara badan oo Itoobiyaan ah oo ay wehliyaan kuwo Soomaali ah oo ka tirsan dowladda federaalka ayaa aroornimadii saaka ku kalahay xaafadaha Barwaaqo, tiida, Tire biyaano Km-4 iyo meelo kale oo dhamaantood ka kala tirsan degmooyinka Dayniile iyo Waaberi ee magaalada Muqdisho, halkaasoo ay ka bilaabeen howlgalo baaritaan ah oo ballaaaran oo saameyn xoog leh dadweynaha ku dhaqan halkaasi.

Ciidamada Itoobiya ee galay qeybo ka mid ah deegaanka Dayniile ee magaalada Muqdisho ayaa lagu soo waramayaa in ay qabqabteen isla markaana xabsiyadda u taxaabeen tiro dhalinyaro ah oo ku sugneyd xaafadahaasi, kana mid ahaa dadka deegaanka, kuwaasoo hase ahaatee aan tiradooda la shaacin, waxayna ciidamada galayeen guryaha qaar iyo meelo kale oo ay ku tuhmayeen iney ku jiraan kooxaha iyaga weerarka ku soo qaada.

Sidoo kale, ciidamada Itoobiya ayaa saaka lagu arkay qeybo ka mid ah degmada Waaberi gaar ahaan inta u dhexeysa isgoyska Km-4 illaa Tire biyaano oo ka wada tirsan xaafadda 1-da Maajo ee degmada Waaberi, iyagoo si gaar ah u beegsanayey dhisme halkaasi ku yaala oo maalintii doraad meel u dhow ay kula qaraxday ciidamadaasi miino loo geliyey inkastoo aysan iyaga wax qasaare ah ka soo gaarin oo ay ku dhinteen labo ruux oo rayid ah, halka afar kale ay ku dhawacmeen, waxayna ciidamadani ay ka joojiyeen saaka nawaaxiga goobaha ay ku sugan yihiin socodkii dadka iyo gaadiika.

Guddoomiyaha golaha dhaqanka iyo midnimada beelaha Hawiye Maxamed Xasan Xaad ayaa ku eedeeyey saaka in cidamada Itoobiya galeen qeyb oo ka mid ah degmada dayniie oo iska nabdoonaa, ayna weerareen xeryo uu sheegay iney ku noolaayeen dad soo barakacay oo dhibaatooyin kala duwan ay u geysteen, wuxuuna xusay Xaad in dadkaasi la boobay hantidooda, lagana qaatay wax alla iyo wixii ay heysteen, isagoo inntaa ku daray in sidoo kale ay galeen ciidamada masaajidyo ay ku soo qabqabteen dad ku cibaadeysaneyey, isagoo baaq u jeediyey aduunweynaha kana codsaday iney la soo gaaraan shacabka Soomaaliyeed ee xasuuqa iyo gumaadka lagu hayo.

Abdoukarim Qamaan ALi "Fiiri"
(BNN) Boramanewsnetwork
Boramanews.com