Boorama(Bnn)Maamulka degmada Baki, iyo duqayda deegaankaas ayaa ku cambaareeyay gudoomiyaha Awdal hadal ka soo yeedhay oo uu eedayn ugu soo jeediyay xubnihii komishanka qaranka ee dhawaan gobolka u yimid magacaabida gudiyada gobolka iyo degmooyinka ee diiwaan galinta iyo komishanka doorashada.

Hadalkan ay daba joogeen maaamulka Baki iyo odayadu ayaa ku soo baxay wargayska Haatuf cadadkiisii Axadii todobaadkan, warkaas oo sheegayay in gudoomiyaha Awdal komishanka qaranka ku eedeeyay inay badaleen xubnihii komishanka degmada ee ay maamulka iyo xisbiyada gobolku isku raaceen laguna badalay xubno aan la ogayn taas oo doorsahada waxyeelo u keeni karta.

Hadaba Mayorka degmada Baki md Barre Jaamac Yuusuf oo hadalkaa gudoomiyaha daba jooga ayaa shir jaraaid oo ay xafiiskiisa degmada si wada jir ugu qabteen isaga iyo duqayda deegaanka ku cambaareeyay hadalkaa ka soo yeedhay badhasaabka waxaanu hadalkiisii ku yidhi mayorku"badhasaabka Awdal kamaanaan filayn waxyaabaha uu ku hadlay waa looga fiican yahay waayo dadka gobolka oo dhan ayuu madax u yahay mana aha inuu cid gaar ah isku koobo, wakhtigana maaha mid loo baahan yahay in umada la kala kexeeyo doorashadana la xumeeyo sidaa awgeed waxaan u soo jeedinayaa inuu ka tanaasulo kana raaligaliyo dadka reer Baki iyo komishanka qaranka ee uu kula kacay eedaynta iyo waxyaabaha aan laga filayn"

Mayor Barre isaga oo sifaynayay xubnaha komishanka ee ay u gudbiyeen waftigii komishanka qaranka ee soo booqday iyo sida ay wax uga jiraan eedaynta komishanka loo soo jeediyay waxaanu yidhi"waxaan aad uga mahadnaqaynaa komishanka qaranka ee sida quruxda badan nooga gudoomay gudidii komishanka iyo diiwaangalinta ee ay dadka deegaanku soo xusheen, iyaga oo komishanku markay noo yimaadeen noo sheegay inay sidaan warqad cad oo ay ku qori doonaan cida dadku isku raacsan yahay, anaguna waxaan u dhiibnay liiskii ay beesha Baki waxgaradkeeda iyo wakiilada sadexda xisbi ee degmadu u soo gudbiyeen maamulkooda degmada oo ahaa mid la isku raacsan yahay anaguna aan ku qanacnay, sidaa awgeed anagu ma ogin mana ogolaan doono in cid kale wax noo yeedhiso"

Xubno ka mid ah odayada iyo duqayda degmada ayaa iyaguna sheegay inay aad uga soo horjeedaan eedayntii badhasaabka ee degmadooda. Maxamed Xasan Caamir oo odayadaas ka mid ah waxa uu yidhi" si cadaalad ah ayaanu anagu u qaybsanay hadaanu nahay beelihii degmada, waxaanan raali ku nahay xubnahaa komishanka ee degmadu raaliga ka tahay beesha Bakina isku raacday, waanan ka xunahay ee waftigii qaranka komishanka la eedeeyo iyada oo la doonayo in nala dul keeno dad aanaan garanayn mana ogolaan doono"

Oday Cumar Cismaan ayaa isna hadalkiisa ku yidhi" xubnahan la leeyahay wax baa lagu badalay anaga oo ah duqaydii degmada ayaa soo xulay iskuna raacnay iyada oo aanay nooba iman waftigii komishanka ee qaranku, kuwaasaanan raali ku nahay cid aan iyaga ahayna degmada ma matali karto". Maxamuud Jaamac Yuusuf oo isna duqayda ka mid ahaa waxa uu yidhi" xubnahaa aanu anagu ka tashanay ee aanu isku raacnay, maamulka degmadanu raaliga ka noqday ayuun baa sharci ah oo degmada komishan u noqon doona, waayo anagu ma ogin maamul doorasho qabanaya ee dadweynaha ayaa wax dooranaya iyaga[maamulku] waxay ka mid yihiin kuwa loo xaqsoorayo markaa ka yeeli mayno inay wax noo yeedhiyaan"

Dhinaca kale wakiilada sadexda xisbi ee degmada Baki ayaa iyaguna dhaleecayn u soo jeediyay eedayntaa loo soo jeediyay komishanka qaranka iyo dadka reer Baki, Dayib Xasan Raage oo ah ku simaha gudoomiayaha Baki ee xisbiga Udub ayaa isna hadalkiisa ku yidhi" si cadaalad ah oo midaysan ayaanu sadexda yada xisbi wakiladooda degmadu iskugu raacnay xubnaha gudida komishanka kuwaas oo dadka deegaankuna ku wada raali yahay anagaana u gudbinay maamulka degmada iyo komishanka qarankaba, mana ogolin xumaan in laga sheego, gudoomiyaha gobolkana waxaan ka tacsiyadaynaynaa hadalkaa deelqaafka ah ee ka soo yeedhay".

C/qani Cige oo isna ah gudoomiye ku xigeenka xisbiga Ucid ee degmada Baki ayaa isna dhiniciisa ka sheegay inay raali ku yihiin xubnaha gudida komishanka ee ay dadka deegaanka iyo wakiiladooda xisbiyada degmadu isla ogolaadeen cid meel kale laga keenana aanay ogolaan doonin.
Maxamed Siciid Yey oo isna ah gudoomiyaha xisbiga kulmiye ee degmada Baki ayaa isna waxa erayadiisa uu ku sheegay sidan"hadii aanu nahay wakiilada Baki ee xisbiyada waxaanu cadaynaynaa inaanu ku kalsoonahay xubnahaa dadka degmada ee sida xalaasha ah lagu soo xulay waxaanan leenahay raga Boorama ka soo hadlaya horta Boorama xalaal ka soo dhiga inta aydaan anaga na soo fara galin, ta labaadna ogaada inaanaan ogolaan doonin wax aad noo yeedhisaan".

Boramanews Network
Cabdiraxmaan Maxamad Habane
Borama