Garoowe(Bnn)- Guddida Dib u eegista Dastuurka Cusub ee dowlad Goboleedka Puntland ayaa kulankoodi ugu dambeyey ku kala kacay ka dib markii  odayaasha dhaqanka oo looga baahna inay ansixiyaan ay sheegayn inay u baahan yihin wakhti dheeraad ah oo ay kusoo darsaan.
 
Ergooyinka Shirkada iskugu yimid ayaa la doonayey inay dib u eegis ku sameeyan Draft-ka Dastuurka cusub iyadoo isla marka la doonayey inay kaabis iyo waxkabadal kadib ay ansixiyaan.
 
Odayaasha Dhaqanka ayaa ku dooday inay u baahan yihin wakhti dheeraada oo ay ku darsaan Dastuurka Qabyada ah oo la doonayo in lagu dhaqo Puntland kaas oo odayaashu ay shaki wayn ka muujiyeen ujeedada xiligan loogusoo beegay iyadoo ay wakhti yar ka hadhsan tahay xiligii doorashada Puntland.
 
qaar ka mid ah odayasha ayaa sheegay inay ka shakisan yihin in dastuurka cusub loola jeedo in Puntland laga gooyo Somalia lagana dhigo Dal madax banan sida Somaliland oo kale.
 
Qodobada ay ka boodeen odayashu waxa kamid ah Qodobka Seddexaad Farqadiisa Seddexaad oo odhanaysa " Marka la dhamaystiro Dastuurka Fedaraalka ee Afti Dadweyne lagu Ansixiyo waa inay Puntland yeelata Astaamaha Qaran Madaxbanan".
 
Qaar ka mid ah dadka indho indheeya siyaasada Puntland ayaa ku doodaya in qodobkaas loola jeedo in Puntland laga gooyo Somalia, Madaama aan Gobol dal ka mid ahi aanu yeelan karin Astaamaha Dal Madax banan.
 
Qaar ka mid ah Odayaaasha iyo siyaasiyinta ayaa iyaguna ka biyo diiday qodob kale oo isna ka hadlaya Xuduudaha Puntlanad ku jira Dastuurka Cusub kaas oo isna odhanaya " Puntland waxay ka kooban tahay Gobolada, Bari, Nugaal, Sool, South of Togdheer (Buuhoodle) Mudug (Harardheere ilaa Hobyo) iyo Sanaag (Ceelafweyn ilaa WaqooyiGalbeed Degmada Ceerigaabo)". Odayashu waxay ku doodayan in Qodobka Khilaafsan yahay Siyaasada Dowlada Federalka, iyagoo sheegay in dowlad Goboleedyada la dhisi doono aanay xaq iyo awood u lahayn inay xuduudahooga iyagu astaystaan balse ay dowlada dhexe ee Federalku samayn karto uun xuduudaha Gobolada.
 
Qodobka kale ee isna shakiga ku abuuray dadka ku lugta leh siyasada Puntland ayaa ka hadlaya astaanta,Calanka iyo Heesta Qaranka. iyadoo Dastuurka Cusub uu ka booday inuu si cad u qeexo Astaanta Qaranka, Calanka iyo Heesta Qaranka uu sheegay in Go'aan laga gaadhi doono.
 
Iskusoo wada Duubo dad badan badan oo indho indheeya Siyaasada Puntland ayaa sheegay inay si wayn uga shakisan yihin in Maamulka Cade Muuse uu qorshaynayo inuu ka goosto Somalia inteeda kale,
 
Borama News Network
Hargeysa Office