Boorama(Bnn)Wafti
balaadhan oo uu hogaaminayay wasiirka arimaha Gudaha
md C/laahi Cali Ismaaciil[C/lahi Ciro] ayaa shalay
ka qayb galay munaasabad balaadhan oo loogu
wanqalayay degmada cusub ee Magaalo cad oo ka mid ah
16 kii degmo ee dhawaan la magacaabay.
Munaasabadan ayaa
shalay ka dhacday xaruntan degmadan cusub ee Magaalo
cad oo hore uga tirsanaan jirtay degmada Boorama ee
G/awdal, waxaana ka soo qayb galay boqolaal qof oo
ka kala yimid deegaanada Boorama, Gabiley, Hargaysa
iyo deegaanka ismaamulka Somalida Itoobiya,
xubnahaas oo ay ka mid ahaayeen wasiiro, xildhibaano
golayaasha baarlamaanka ah, maamulka Awdal,
salaadiin,cuqaal iyo duqayda iyo bulshada deegaanka
Magaalo cad ee u xafladaynayay degmadooda cusub,
waxaana halkaas lagu soo bandhigay ciyaaraha hidaha
iyo dhaqanka, gabayo iyo fardo shaaximan oo madasha
ku maray socod qoob ka ciyaar ah.
Maxamed Nuur Suldaan oo ku hadlayay gudida
qabanqaabada xaflada ayaa ku furay warbixin ku
saabsan taariikhda degmada Cusub ee Magaalo cad oo
uu sheegay inay hodan ku tahay waxsoosaarka beeraha
iyo djhaqashada xoolaha oo u lafdhabar ah isla
markaana ay ku taalo goob leh istaraatijiyad ganacsi
oo xuduud wadaag la ah dalka Itoobiya. Waxa kale oo
uu carabka ku dhuftay baahi dhinaca biyaha nadiifta
ah iyo dhinaca siyaasada oo uu sheegay inay
balanqaadayaan nabad ku wada noolaanshaha iyo
adkaynta nabadgalyada iyaga oo soo dhaweynaya mudo
kordhintii golaha guurtida ee madaxweynaha iyo ku
xigeenkiisa
Wasiirka arimaha gudaha C/laahi Cirro ayaa isna
madashaa ka sheegay inay xukuumada somaliland ka
go,an tahay in maamulka hoos loo daadajiyo lana
gaadhsiiyo goob kasta iyo meelkasta oo ku haboon
waxaanu yidhi isaga oo la hadlayay bulshada degmadan
cusub ee Magaalocad"waxaan idinkula dardaarmayaa
inaad cashuurta si wanaagsan u bixisaan, hadii aad
awal u hagran jirteen cashuurta Boorama idinka
tagaysa maanta idinkaa maamulanaya la,aanteedna
horumarka aad doonaysaan ma gaadhi kartaan waayo
degmonimada waa lagala noqonayaa meel kasta oo aan
dhaqaale ahaan isku filnayn, mida kale nabadgalyada
waad ku wanaagsanaydeene imikana sii xoojiya kana
faaiidaysta dhulbeereedka balaadhan ee aad haysataan
maanta waad oftihiin oo caalamkii waxa uu ka
qaylinayaa cunto yaraan wadankastaana wixii uu soo
saari jiray wuu guntaday, xukuumaduna qorsheheeda
way ku darsatay miisaaniyadana lacag baa loogu daray
lagu dhiiri galinayo waxsoo saarka si looga
gaashaanto cunto yaraanta caalamka saamaysay"
|
Xildhibaan Axmed Yaasiin Sh Cali Ayaanle, xildhibaan
Axmed Aw Cabdi Siciid iyo xildhibaan Nuur Rayaale
Khayre oo iyaguna halkaas ka hadlay ayaa xukuumada u
soo jeediyay inay u soo raaciyaan degmonimada wixii
kale ee ah imkaaniyaadka ka dhiman sida biyaha iyo
miisaaniyadaa waxsoo saarka loo qoondeeyay qayb
ahaan wixii ay xaq u yeelato, iyaga oo aan fariintaa
oo kaliya kaga hadhi doonin balse xukuumada ku
dabagali doona, waxa kale oo ay ka dhawaajiyeen in
iyaga oo ku hadlaya bulshada degmada Magaalo cad ay
balan qaadayaan inay buuxin doonaan dhamaan
shuruudaha loogu aqoonsanayo degmonimo buuxda.
Badhasaabka G/awdal ayaa isna ugu hambalyeeyay
bulshada deegaankan degmada cusub ee loo magacaabay
oo looga baahan yahay sidii ay u hanan lahaayeen
iyaga oo ka dheeraanaya waxkasta oo dib u dhigi kara
oo ka reebi kara tartanka degmooyinka cusub ee la
magacaabay u gali doonaan xaqiijinta himiladooda,
waxa kale oo uu kala dardaarmay inay xidhiidh
wanaagsan iyo isdhexgal dhinaca ganacsiga ah la
sameeyaan dalka Itoobiya oo hada xidhiidh wanaagsani.
Afhayeenka xisbiga Ucid Xasan Xuseen ayaa isaguna
halkaa kaga dhawaaqay in magaalocad ay mucaarid iyo
muxaafidba degmadoodii tahay cidkastaana u madax
banaan tahay inay taladeeda ku darsato isaga dhinaca
kalena ku hambalyeeyay xukuumada magacaabida
degmooyinka iyo gobolada maamulka hoos loogu
daadajinayo oo ka mid ahayd qorsheyaashii xisbiga
Ucid una arkaan in laga bililiqaystay. Waxa kale oo
uu halkaa ku gudoonsiiyay kooxdii qabanqaabada
munaasabadan afar kooxood dirayskoodii iyo
kubadohoodii oo uu sheegay in xisbigu ugu deeqay
ciyaartoyga degmada cusub ee Magaalocad si ay uga
faaiidaystaan tartamo iyo diyaargarowga tartanka
koobka degmooyinka Jsl ee dhawaan qabsoomi doona.
Waxa kale oo halkaa ka hadlay wasiirka macdanta iyo
biyaha Qaasin Sh Yuusuf, wasiirka Beeraha Aden Axmed
Cilmi[dhoolayare],wasiirka xidhiidhka golayaasha
Cabdi Xasan Buuni,wasiirka dib u dejinta Abshir
Axmed Xasan, wasiirka dalxiiska C/risaaq Waabari,
suldaan Ibraahin Jaamac Samatar,Suldaan C/raxmaan
Dhawal, Caqil C/laahi Cali Xuseen,Caaqil Daahir
Xasan Xaddi, Caqil Ismaaciil Muumin, Xaaji Maxamed
Jibriil iyo xubno kale.
Dhinaca kale Maxamed Sh Xuseen Abraar oo ka mid ahaa
gudida qaban qaabada ayaa munaasabadaa ka dib waxa
uu uga mahadnaqay ka soo qaybgalkii munaasabadan ee
waftigii xukuumada iyo bulshadii kale ee meelwalba
isaga timid isaga oo xusay in sidii ay filayeen si
ka wanaagsan ay u dhacday munaasabada wanqalka
degmada Magaalocad isla markaana uu rajaynayo in
dadka reer Magaalocad ay isku tashan doonaan isla
markaana ay xaqiijin doonaan waxkasta oo looga
baahan yahay si ay u helaan aqoonsi buuxa oo
degmanimo.
Cabdirahmaan Mahamed Habane
Boramanews.com Borama
