Beledweyne(BNN):-
Wararka naga soo gaaraya magaalada Beledweyne ee
xarunta gobalka Hiiraan ayaa sheegaya in uu halkaasi
saaka gaaray Guddoomiyihii hore ee gobalkaasi Yusuf
Dabageed oo in muddo ah ku sugnaa duleedka magaalada.
Yusuf Dabageed ayaa maanta soo
galay magaalada ayadoo ay galbinayaan ciidamo
Itoobiyaan ah wuxuuna haatan ku sugan yahay
gurigiisa ku yaal magaalada Beledweyne.
Yusuf dabageed oo watay gaadiid
badan oo Tikniko ah oo gaaraya 10 ayaa waxaa la
xaqiijiyey in hubkaasi ay gacanta ku hayaan
ciidamada Itoobiya ayadoo aan la aqoon in hubkaasi
loo gacan gelin doono maamulka cusub ee Dowlada
federaalka dhawaan u magacwoday Hiiraan.
Balse Yusuf dabageed aya asagu ku
adkeysanayey inuu weli yahay Guddoomiyaha gobalkaasi
inkastoo xilkaasi uu ka xayuubiyey Ra’iisul Wasaare
Nuur Cadde.
Yusuf Axmed Hagar (Dabageed) ayaan
saxaafada wax war ah siin markii uu soo galay
magaalada ayadoo horey looga bartay inuu ka
khudbadeeyo goobaha dadka ay isugu soo baxaan.
Magaalada ayaa hada isu socodkeedu yar yahay kadib
markii ay magaalada maanta soo buuxiyeen ciidamo
Itoobiyaan ah taasi oo cabsi gelisay shacabka
halkaas ku dhaqan.
Hormedia
