Mogadishu(Bnn)
Wasiirka arimaha dibada ee wadanka
Itoobiya Siyuum Musfin ayaa mar kale ka
hadley ujeedada ay ciidamada Itoobiyaanka u
joogaan Soomaaliya, taasi oo uu ku macneeyey
inay tahay gudashada hawshoodii oo ah inay
caawiyaan Soomaalida si ay u helaan nabad
iyo deganaansho.
Isagoo la hadleyey Telefishinka BBC World
xili uu booqanayey magaalada London ayku
sheegay in Itoobiya ay fulinayso codsi
qoraal ah oo uga yimid DFKMG ah ee
Soomaaliya si loo caawiyo, waxaana uu
sheegay in haatan inta badan Soomaaliya ay
ka jirto nabad buuxda.
Wasiirka arimaha dibada Itoobiya wuxuu
sheegay in ciidamada Itoobiyaan iyo
Booliiska DFKMG ah ay si weyn isha ugu
hayaan inaanay dhicin burbur soo gaara
amaanka, waxaase uu sheegay inay ka
qoomamaynayaan khasaaraha dhimashada ah ee
soo gaaray dadka rayidka, waxaase uu ku
eedeeyey kooxda Al-Shabaab inay ka
dambeeyaan khasaaraha isagoo waa sida
hadalka uu u dhigay’e ku sheegay kooxdaasi
inay u adeegsanayaan caruurta iyo haweenka
gabaad dagaal isla markaana ku qasbaya inay
horey u socdaan ama furimaha keenaan
dadkaasi rayidka ah.
Siyuum Musfin ayaa waxaa la waydiiyey in
ciidamada Itoobiyaanka ay kala kulmeen
Soomaalida soo dhaweyn in kale ayuu wuxuu
sheegay “waxaan la kulanay soo dhaweyn aad u
wanaagsan, marka laga reebo Shabaabka taagta
daran oo isku dayaya inay dad ku sii shidaan
cadowtinimadii Soomaaliya iyo Itoobiyaanka.
Wasiirka arimaha dibada Itoobiya ayaa waxaa
la waydiiyey xiliga ay ciidamadooda kala
baxayaan wadanka Soomaaliya, wuxuu sheegay
Siyuum Musfin in aanay ka bixi doonin
Soomaaliya aysana abuuri doonin jahwareer.
Wuxuu soo hadal qaadey Siyuum Musfin in
sidaasi si la mid ah ay sameystey dawlada
Ugandha oo ciidankeedu qayb ka yahay
ciidamada Aimsom, sidoo kale wuxuu sheegay
inay jiraan dawlado kale oo qorsheynaya inay
ciidamo soo diraan, kuwaasi oo ay haysato
dhibaato xaga logistikada ah.
Wasiirka arimaha dibada Itoobiya wuxuu ku
eedeeyey beesha caalamka inaanay sidii loo
baahnaa u gacan siineyn Dawlada KMG ah ee
Soomaaliya oo uu sheegay inay sugayso in
dhabarka laga riixo.
Siyuum Musfin wuxuu ku eedeeyey dawlada
Eritrea inay qas ka wado Soomaaliya isagoo
tibaaxay in ay ciidamo u dirtey Soomaaliya
si ay ula dagaalamaan DFKMG ah iyo danaha
Itoobiya oo uu sheegay inay gashey khatar
weyn.
